台北 懶人包 玩.台北 玩.台灣

【玩.台北 – 松山區】松山線站站玩 最終站:松山站

終點站松山站可以接駁台鐵,4A出口直去台鐵大堂
當中嘅藝術裝置「域見」吸引力比得上高雄美麗島站光之穹頂

附近仲有人氣夜市饒河街同埋鳩嗚天堂五分埔,以後來松山就好方便啦!

 

藝術裝置「域見」 4A出口 (接駁台鐵大堂中間空地)

你喺香港冇可能見到鐵路公司咁揼本放個大型藝術裝置喺個車站入面,有位放多幾個廣告牌好過啦!
但係台灣捷運公司最鍾意design車站:高雄美麗島站光之穹頂、台北大安森林公園站,同埋呢個最新嘅松山站

域見就放喺4A出口,連接台鐵大堂通道嘅天花板上面
抬頭一望就見到有50,250盞LED燈砌成高低不平嘅天花
表達「河流彎曲之處,域見繁花光穹」嘅意思,同松山地形同歷史互相呼應

 

 

水金當日去參觀呢個作品嘅時候見到好多人都會停低影相、拍片
大家都好驚嘆呢個松山站設計!

先睇睇片:https://www.youtube.com/watch?v=is_rm0j-LFg

 

饒河街觀光夜市 1號出口

相信遊台港人都對饒河街夜市好熟悉啦
水金都係重點提及幾款熱門小吃

 

福州世祖胡椒餅
一到饒河街牌坊就一定會見到一條排好長好長嘅人龍
個個就係等埋胡椒餅出爐啦!

一咬開薄皮嘅胡椒餅,就噴出熱辣辣嘅煙
蔥花同豬肉餡塞滿整個胡椒餅
食嗰時仲要小心熱油燙口呀!

 

爆漿玉子燒

店主曾經上過《康熙來了》即場示範玉子燒,所有嘉賓主持都讚不絕口!
玉子燒即叫即制,保証新鮮:
首先將已準備好嘅蛋漿倒落方形平底鑊慢火煎
一段時間後捲成蛋捲,最後加上沙律醬、自選配料同埋柴魚片就大功告成啦!

店家列出最多人點嘅幾款口味,包括:明太子、鳳梨蝦仁、龍蝦沙拉等等
Weekend來嘅話就要預咗排隊啦!

 

小美國 – 炸Oreo/Snickner/香蕉

同樣上過《康熙來了》嘅老外店主搞搞新意思,見嘢就拎去炸
水金試過炸Oreo,感覺好特別
炸過嘅朱古力餅乾變得軟綿綿,好似海綿蛋糕咁
表面沾上糖霜,但係唔會搶咗oreo嘅味

 

彩虹橋 1號出口

橋上可以踩單車,跨越台北市基隆河就去到另一邊嘅內湖
紅色嘅橋彎彎曲曲,夜晚亮燈後水面上有倒影
成個構圖非常靚,係龍友必到嘅地方!

情侶都好啱來,因為橋前面空地有”LOVE”字樣,好浪漫喔!

 

五分埔 4號出口

台北最大成衣批發地,地方非常大!
大家可以慢慢行,行足一個下晝搜出平、靚、正時裝!

 


【松山線站站玩】7個站介紹完畢,希望大家會鍾意
水金歡迎大家PM蒲.臺島Facebook Page表達意見
最後送上松山線特別彩繪列車:

 

0