呢篇介紹蛋糕的確係打咗尖
因為水金盡量係親身試過先會寫blog介紹返
咁急住出係因為不約而同有兩個去完台南嘅朋友都大大力推介呢間蛋糕店
於是水金就破例，請兩位台南線人借相加做個小訪問…

跟據兩位朋友透露…佢地都係行台南市中心時無意發現呢間蛋糕店

因為門口排滿人龍，所以就行去八卦幫襯一下

點知就好似發現新大陸咁，立即忍唔住Whatsapp比水金啦

既然兩位朋友咁快手，水金都唔輸蝕同大家開心Share

水金翻查台灣美食blog都對呢間蛋糕超正面評價：
香蕉巧克力口味

有微甜、微苦朱古力味和香蕉香
南瓜乳酪甜鹹甜鹹、蛋糕軟嫩入口即化

難怪日日都咁多人排隊啦！

焗好嘅蛋糕會放呢度，用風扇吹凍先入packing，超講究！

名東蛋糕唔係切好逐件逐件賣，而係斷斤磅秤計數
所以你可以買細細件淺嚐，亦都可以買一大件返香港做手信

睇個List有好多種口味，但其實只有原味係每日供應
其他味係schedule咗每個禮拜指定日子出爐
多個台灣媒體已經報導過必食原味，所以好容易被人搶晒

排咗隊一定買到蛋糕，但係唔會保證一定得到原味
當然你可以等下一round原味出爐，而又唔使再排過嘅…
總之大家要有心理準備排隊等等，要食好味嘅嘢就係要比啲耐性！

買一細件南瓜乳酪就可以用膠袋pack好
即場食就試到軟綿綿嘅蛋糕同埋乳酪絲返到酒店食都唔會太變質呀！

如果要拎返香港，水金就建議比NTD 10買個盒
裝住大大件蛋糕就唔怕返到香港散晒爛晒啦

店家溫馨提示保存蛋糕方法：
1. 新鮮出爐蛋糕裝入盒/膠袋之後唔可以閂蓋/綁埋，避免水氣令蛋糕沾濕
2. 蛋糕冇防腐劑，當日食唔晒就要用盒/膠袋
    並閂蓋/綁埋放入雪櫃，可以Keep 2-3日
3. 如果 2-3日都食唔完，就放入冰箱，要一個禮拜內完成佢

返到香港之後，放入雪櫃嘅蛋糕可以直接凍食
擺喺冰箱嘅蛋糕就要解凍先好食
又或者放入微波爐叮10秒，就嘆到好似新鮮出爐嘅蛋糕

 

朋友短評：
名東現烤蛋糕食落個蛋糕底似香港日式芝士蛋糕咁
但係比香港嘅再綿啲滑啲
而且佢係新鮮焗，所以即晚食都仲好好味

 

強烈建議蛋糕叮熱食，尤其係南瓜乳酪口味
叮熱後蛋糕軟綿綿，更重乳酪味，表面會脆脆
重點係有乳酪絲！

 

名東現烤蛋糕

營業時間：7AM – 7PM

地址：台南市中西區民生路二段95號

電話：06 222 1199
Facebook 專頁：https://www.facebook.com/mingdongcake

點去：台車火車站/安平坐2號公車，郭綜合醫院站落車
        向海安路二段行1分鐘，近十字路口嘅左手邊就係
台南市內地方唔大，可以連埋海安路/神農街一同遊覽

 

*特別嗚謝 Joyce Leung、Dongee Hon資料提供